posta@acompagna.org

Statuto   successivo

A Compagna > Statuto > Statuto del 1923 (anno di fondazione)

Statuto:
[Art. 1] [Art. 2] [Art. 3] [Art. 4] [Art. 5] [Art. 6] [Art. 7] [Art. 8] [Art. 9] [Art. 10] [Art. 11] [Art. 12] [Art. 13] [Art. 14] [Art. 15] [Art. 16]

Regolamento:
[Scopo da «Compagna»] [Ammiscion] [Parlamento] [Consûlta e Conseggetto] [Commiscioîn de Consûlta]

 

Clicca per leggere la dedica Statuto del 1923 stampato a Buenos Aires. Clicca per quello stampato a Genova

horizontal rule

Statûto

[inizio pagina]

1.

L'é costituia a Zena A COMPAGNA di Zeneixi.

[inizio pagina]

2.

O sò scopo o l’é quello, cö promêuve a costitûzion de «Compagne» in ti diversci centri da Ligûria, de mantegnî e ravvivâ e antighe e gloriose tradizioîn da nostra cittae e da nostra region; de ispirâ e coltivâ a religion de memoje do passôu; de impedî che Zena e a Ligûria perdan e sò caratteristiche de ûsi e de costûmmi, de arte e de parlâ, e infin, affiatando i vëi Liguri fra lö, de dâghe a manëa de fâ sentî, quande segge ûtile, a sò voxe, sensa però intrigâse de partii politici.

[inizio pagina]

3.

Pêuan fâ parte da «Compagna», pûrché seggian çittadin italien:

  1. Tûtti i zeneixi figgi de poae nasciûo a Zena, anche se son nasciûi pe caxo fêua de Zena e se no ghe risiedan;
  2. Tûtti i liguri figgi de poae, nasciûo drento a-i confin de l'antiga repûbblica (1797), anche se lö pe caxo ne son nasciûi fêua, basta che risiedan a Zena dall'anno da fondazion da «Compagna»;
  3. Tûtti quelli che son nasciûi a Zena e che risiedan a Zena da aomeno trent'anni;
  4. Tûtti quelli che son nasciûi drento i confin de l'antiga repûbblica (1797), pûrché ghe risiedan da aomeno trent'anni e staggan a Zena dall'anno da fondazion da «Compagna»;

Solo in caxi specialiscimi, trattandose de personn-e che aggian ben meritôu de Zena, da Ligûria, dell'Italia, a «Consûlta», a porriä derogâ in parte a quello che l'é stabilïo da questo articolo.

[inizio pagina]

4.

No gh'é de limite mascimo pe-o nûmero di socï, comme no l'é prescrïto, a riguardo de l'etae di maeximi, nisciûn limite minimo, ma tûtti devan pagâ a sò tangente, pagamento a-o quae no son però tegnûi dûrante o tempo che stan sotto e armi.

[inizio pagina]

5.

L'assemblea generale di socï a costituisce o «Parlamento».

Tûtti i anni, o giorno da Domenega de San Zorzo. o «Parlamento» convocôu cô-a ciû grande pûbbliçitae, o l’elëze ûnn-a «Consûlta» determinandone o nûmero che o porriä ëse de çento personn-e a-o mascimo, çernûe fra i «Compagni», maggiorenni, che restiän in càrega ûn anno.

Questi «Consûltoî» pêuan ëse eletti pe acclamazion o a voti, segondo, votta pe votta, decidde o «Parlamento».

[inizio pagina]

6.

A «Consûlta» a çerne poi tra i sò membri (anche chì pe acclamazion o pe votazion) sei «Consoli», cappi e rappresentanti da «Compagna», e dixêutto ätre personn-e che, co-i «Consoli», forman o «Conseggetto», comitato esecûtivo, e deliberazioîn do quae devan però ëse approvae dä «Consúlta» e ispirâse sempre a-e decisioîn de questa.

[inizio pagina]

7.

I «Consoli», a turno, presiedan o «Conseggetto»; a «Consûlta» e o «Parlamento» se nominan comme Prescidente, votta pe votta, quello di sò membri che lö creddan mëgio.

[inizio pagina]

8.

Tûtte e riûnioîn sän valide qualunque o segge o nûmero di intervegnûi, e, quande se ha da fâ de votazioîn, e relative deliberazioîn, pe ëse valide, bezêugna che aggian avûo tanti voti pe-o meno quanto a meitae ciû ûn di votanti.

[inizio pagina]

9.

Tûtti quelli che han de càreghe, quande scazzan, pêuan torna ëse nominae; gh'é però incompatibilitae fra e càreghe da «Compagna», e e càreghe elettive pûbbliche.

[inizio pagina]

10.

O «Conseggetto» o l'ha a facoltae de scassâ da-o libbro di soci quello che o se segge dimostrôu indegno de appartegnî ä «Compagna» accordandoghe diritto d'appellâse ä «Consûlta».

[inizio pagina]

11.

In te tûtte e riûnioîn da «Compagna» se parliä zeneìze e anche i verbali de radûnanse sän esteìxi in zeneìze.

[inizio pagina]

12.

O «Parlamento», oltre o giorno da domenega de San Zorzo, o porriä ëse riûnio tûtte e ätre votte che a «Compagna» a o creddiä necessajo o che non meno de 500 «Compagni» ne aggian faeto domanda.

[inizio pagina]

13.

A «Consûlta», oltre i «Consoli» e o «Conseggetto», a nomina e varie «Commiscioîn de Consûlta» segondo l'é determinôu da-o regolamento e qualunque ätro organo che poëse apparî conveniente a-o bon funzionamento da «Compagna». Ogni Commiscion a deve ëse costituïa da ûn minimo de ûnze personn-e, de quae non meno de sette piggiae dä «Consûlta», e fra queste aomeno due da-o «Conseggetto» e quattro dä «Compagna».

E anche quande e «Commiscioîn» son zà formae, a «Consûlta» a pêu azzunzighe de ätre personn-e che daggan affidamento de voeì travaggiâ, çernendole fra i sò membri o ciammandole dä «Compagna».

[inizio pagina]

14.

A «Compagna» a no porriä ëse sciolta finché pe-o meno a sä forte de çinqueçento socï.

[inizio pagina]

15.

Pe tûtto quello, che no l’é contemplôu da-o «Statûto» provedde o regolamento interno.

[inizio pagina]

16.

Solo o « Parlamento» o pêu, occorrindo, modificâ o Statûto, mentre pe cangiâ o regolamento basta a «Consûlta».

horizontal rule

Regolamento

[inizio pagina]

SCOPO DA «COMPAGNA»

1.) A «Compagna», pe arrivâ a-i scopi ch'a se proponn-e, a çerchiâ de ottegnî a ciû larga diffûxion.

Pe conseguensa a porriä promêuve de radûnanse pûbbliche, de feste, de conferense e de gite; bandî di concorsci; fâ de pûbblicazioîn: eccitâ i ûffiçi pûbblici amministrativi e artistici a stûddiâ e a eseguî quelle cose che son de sò competensa, ma de interesse generale; sparze in mëzo ä gente a conoscensa de quello ch'a l'ha faeto e de quello che a vêu fâ, con l’aggiûtto da stampa çittadinn-a, e, quande, segge o caxo, co-a pûbblicazion de ûn giornaletto o de ûn bollettin, ecc., segondo e iniziative che i rappresentanti da «Compagna», possan piggiâ anche d'inteìza co-i rappresentanti de «Compagne» federae di ätri centri da Ligûria, che fän cappo a quella de Zena.

[inizio pagina]

AMMISCION

2.) I çittadin italien che, segondo stabilisce o Statûto, pêuan fâ parte da «Compagna» devan firmâ ûnn-a scheda de adexion a o statûto stesso e a-o relativo regolamento, dicciarando e proprie generalitae.

Chi domanda de ëse ammisso a fâ parte da «Compagna» o deve ëse presentôu da un compagno zà inscrito.

Drento treì meixi dall'approvazion de questo Regolamento, pe-o primmo anno, e dall'elezion da «Consûlta», pe-i anni a vegnî, a maexima «Consûlta», o direttamente o incaregandone o «Conseggetto», a l’esamminiä i titoli di nêuvi compagni pe tûtti i effetti previsti da-o Statûto.

A tangente sociale a l'é fissä in te ûn scûo.

[inizio pagina]

PARLAMENTO

3.) Pe-a riûnion do «Parlamento», segondo disponn-e l'articolo 5 do Statûto, i «Consoli» proveddan a convocâlo pûbblicandone l'annunzio aomeno ûnn-a settemann-a primma in scï giornali de Zena. Pêuan ascì, se a-o «Conseggetto» a ghe parriä cosa ûtile, fâ attaccâ di manifesti in scï canti: ma no han mai obbligo de mandâ avvisi personali.

O «Parlamento» o delibera anche, anno pe anno i bilanci da «Compagna» e o discûtte e o l’apprêuva a relazion morale e finanziaia dell'anno primma, presentä da-o «Conseggetto». O l'elëze, anche pe acclamazion, ûn o ciû segretäi pe l'adûnansa, perché possan compilâne e firmâne, cö Prescidente, o verbale.

O Prescidente do «Parlamento», nominôu comme prescrive l'articolo 7 do Statûto, o dirizze a discûscion, o çerne, quande ghe vêuggian pe quarche votazion, treì scrûtatoî e o proponn-e a-o «Parlamento» o segretäio o i segretäi da nominâ pe l'adûnansa.

[inizio pagina]

CONSÛLTA E CONSEGGETTO

4.) A «Consûlta» nominä da-o «Parlamento» a se deve riûnî drento dexe giorni dä sò elezion, ch'a sä sûbito annunçiä a quelli, che son staeti eletti, da-o Prescidente do «Parlamento» con lettera personale.

A «Consûlta» scheìta a convoca in ti dexe giorni prescriti a nêuva «Consûlta» e a ghe consegna l'amministrazion con ûn verbale firmôu da treì deleghae da «Consûlta» vëgia e treì da nêuva.

In ta sò primma radûnansa a «Consulta» a nomina i sei «Consoli» e i ätri membri do «Conseggetto», segondo dixe l'articolo 6 do Statûto.

In ta maexima radûnansa se stabilisce o turno di «Consoli», ognidûn di quae o presiede pe duî meixi o «Conseggetto». E quande ûn, pe qualunque motivo, o no poëse, intra in càrega o «Console» indicôu pe-i duî meixi successivi e coscì de seguito.

A «Consûlta» e o «Conseggetto» son convochae da-o «Console» de turno. A «Consûlta» a se deve riunî aomeno ûnn-a votta ogni duî meixi e o «Conseggetto», aomeno ûnn-a votta a-o meize.

O «Conseggetto» o l'eseguisce e deliberazioîn da «Consûlta»; però in ti caxi ûrgenti o pêu piggiâ e decisioîn ch'o credde ûtili e necessaie, fandole approvâ in ta primma sò riûnion dä «Consûlta».

A corrispondensa ordinaia da «Compagna» a l'é firmä da-o «Console» de turno e da-o segretaio do «Conseggetto».

Tûtto quello ch'o porta con lë ûnna responsabilitae morale o finanziaia, primma de ëse eseguio, o deve sempre ëse deliberôu da-o «Conseggetto» e ratificôu, quande segge o caxo, dä «Consulta».

[inizio pagina]

COMMISCIOÎN DE CONSÛLTA

5.) E «Commiscioîn» de «Consûlta» previste dall'art. 13 do Statûto son, pe aoa, ûnze:

  1. Uffizio di Cancellê;
  2. Giunta de Conseggio;
  3. Uffizio de Monaea;
  4. Conservatoî do Mâ e di Traffeghi;
  5. Commiscion de Edilizia e d’Arte;
  6. Protettorato do Costûmme;
  7. Uffizio de Sanitae;
  8. Giunta dell'Annona;
  9. Patronato de Soccorso;
  10. Giunta di Stûddi;
  11. Commiscion de Çerimonie.

A queste «Commiscioîn de Consúlta» gh'é azzunto un «Conseggio de Damme».

Ogni «Commiscion», (e sò funzioîn son stabilïe dä «Consûlta») a se nomina, comme a credde megio, ûn prescidente, ûn segretaio e ûn o ciû relatoî pe e questioîn da trattâ.

E proposte, i dexidëì, e memoie, e domande, ecc. de diverse «Commiscioîn» son poi esamminae da-o «Conseggetto» e infin presentae ä «Consûlta» perché a decidde.

A «Consûlta» a l'indica a-e «Commiscioîn», segondo a competensa de ognidûnn-a, e questioîn da stûddiâ; ogni «Commiscion» però a pêu de sò iniziativa stûddiâ ascì de atre questioîn, e fâ a-o «Conseggetto» de proposte, che lë o l’esamminiä e o portiä davanti ä «Consûlta».

[inizio pagina]

Statuto del 1923 stampato a Genova. Clicca per quello stampato a Buenos Aires

[inizio pagina]