A Compagna > Fotografie > 25 Giugno 2011

Festa di chiusura dei
"Martedì in Compagna"

Testo di Antonio "Pierin" Fioravanti
Foto di Andrea Patrone

E tò-u li che ghe semmo finalmente! L’ea l’oa de rionî un pö de zeneixi rizo ræo pe poéi scangiâ quarche pòula segûi d'êse capîi sensa malinteixi.

Questo o l’é sucesso into ciòstro da Madònna de Vigne donde no ò solo sentîo parlâ, ma ascì cantâ inta nostra lengoa.

A societæ A COMPAGNA a l’à vosciuo saluâ e aogurâ bonn-a estæ e bonn-e ferie ai çitadin de Zena pròpio into cheu da çitæ. E quæ megio posto do ciostro de Vigne? Inte quello spaçio dove, pe tenpi, se univan i nostri antighi a fâ discorsci de fede, de comercio, e quarche vòtta magara anche pe ciætezâ? Gh’é quarcösa de megio che into cheu da nostra Zena? Tanto ciù che pe mi, ciarlâ e cantâ e nostre cöse l’é anche rivive o tenpo de quand’éimo figeu che squaddre e squaddrette do coscì dito ‘canto popolare’ ghe n’êa pe tutta Zena.

E aloa, ecote chi ‘na squaddra ch’a m’à fæto rescioâ o cheu e a mente. A sciù dîta a l’é de Bösanæo, a se ciamma “I Racheugeiti” perché, e questo o l’é bello, i conponenti no son tutti de quello scito, ma ghe n’é de diversci quartê zeneixi anche ben distanti un da l’atro. Quest’insemme o no s’é formòu da ‘na scheua ma, comme pe caxo, inte ‘na ciasetta da çitæ antiga: in ciasetta Locoî donde di amanti do canto corale zeneize, àn comensòu cianin con quarche tralalero e poi se n’é azonti pe caxo di atri e àn finîo pe formâ ‘na squaddra comme se deve con un nomme ch’o l’é a seu presentaçion: “I Racheugeiti”.

Aloa: quella de sabbo a l’é stæta ‘na vera festa con cansoìn de ‘na vòtta ch'àn riçevuo batiman e consensi a no finî. I canterin braviscimi: bonn-e e belle voxe i bassi e i baritoni che fan da sfondo sonoro e marcan o ritmo, i tenori ascî ciæi, linpidi; abiliscima a chitâra, preciza e armonioza, e o soprano. Questo chi eceçionale: êan anni che no sentivo cantâ in “farsetto” coscì ben e con tanta capaçitæ.

E poi, a-a fin, a festa as’é conpîa co-a tradiçionale bevua: fugassa, e vin gianco a piaxei.

(clicca sulla fotografia per ingrandirla)